بقلم / رضا السعيد
هي مصر ليه بتستورد غاز من إسرائيل ؟ وازاي بنستورد غاز من إسرائيل وفي نفس الوقت بنصدر غاز لأوروبا ؟
في الأول هنعمل نبذة شديدة الإختصار عن الفرق بين الغاز الطبيعي والغاز المسال .
الغاز الطبيعي بيتم استخراجة من الحقول بصورة طبيعية من باطن الأرض إما مصاحباً لآبار البترول أوعن طريق آبار منفردة ، وبيتكون الغاز الطبيعى من مواد الميثان والايثان ، ولابد من استخلاص المتكثفات والبوتاجاز من الغاز الطبيعى لاستخدامه ، وبيتم تسييله فى درجة حرارة معينة لنقله مع إمكانية تصديره .
الغازالمسال بيتكون من مواد البيوتان والبروبان ، وبيتم انتاجه عن طريق معامل التكرير والتسييل للغاز الطبيعي ، بالإضافة الى انه بيتم نقله من خلال شبكات خطوط الأنابيب أو السيارات "الصهريجية" من مناطق إنتاجه إلى المصانع أو أن يتم تعبئة اسطوانات البوتاجاز ، أو حاويات نقل الغاز عند النقل لمسافات طويلة كالتصدير للدول .
#معلومة 👌إستنادًا لبعض المواقع العلمية فإن تسييل الغاز الطبيعي بيقلل الحجم بنسبة 1 : 600 ، بشيء من التفصيل ، حجم المتر مكعب من الغاز المسال بيساوي حجم 600 متر مكعب من الغازالطبيعي في حالته الغازية .
ليه مصر بتستورد غاز من إسرائيل وقبرص ؟
* بإختصار شديد والإجابة في كلمة واحدة وهي " التسييل " ، مصر بتمتلك بنية تحتية كبيرة جدًا في مجال نقل الغاز وبتمتلك محطتي إسالة بقدرة 635 مليار قدم مكعب سنويًا وهما محطتي الإسالة بإدكو ودمياط ، وبناء عليه مصر بتستورد الغاز من اسرائيل وقبرص خام في حالته الطبيعية وبعد كدا يتم تسيله وتصديره لأوروبا ، وبالفعل مصر بدأت في التصدير لـ أوروبا بطاقة إجمالية مليار قدم مكعب يوميَا ومستهدف وصول الرقم لـ 2 مليار قدم مكعب يوميًا .
ليه إسرائيل بتصدر لمصر ومبتسيلش الغاز عندها ؟
* علشان معندهش محطات تسييل ( مصر الدولة الوحيدة في المنطقة اللي بتمتلك محطات تسييل ) .
ليه إسرائيل معندهش محطات أسالة ؟
* بناء محطات إسالة بيلزم بنية تحتية ضخمة بتكلفة عالية جدًا ، دا غير إن الشريط الساحلي في إسرائيل مكتظ بالسكان ومفيش مكان يقدر يحتوي محطات إسالة ، بالإضافة الى ان الشركات العاملة في مجال الغاز الاسرائيلي محتاجين يبيعوا الغاز اللي بيمتلكوه بأقصى سرعة لتغطية النفقات وإيجاد سيولة كافية لإستكمال أعمال التنقيب والإستخراج الغاز ، فمفيش رفاهية الوقت انهم يبنوا محطات مدة إنشاءها ممكن توصل لـ 7 سنين ، ناهيك إن الحكومة الإسرائيلية متمثلة في المؤسسات المعنية بشؤون البيئة رفضت موضوع إقامة محطات تسييل بسبب البيئة وبسبب إكتظاظ السكان على السواحل زي ما ذكرنا .
ليه مصر مدخلتش ضمن اتفاق خط أيست ميد اللى تم بين قبرص واليونان وإسرائيل ؟
* مصر رفضت إنها تدخل ضمن الإتفاق لأن الخط هينقل الغاز بصورته الطبيعية عكس إستراتيجية مصر واللي هي تصدره بعد التسييل وليس مادة خام .
هل الإتفاق وخط إيست ميد هيأثر على مصر ؟
* بكل تأكيد لا ودا لأن الخط لسه هيشتغل سنة 2025 ، دا إن الخط إتنفذ فعلًا لأن لحد دلوقتي لسه مفيش أي تمويل للإنشاء واللي تكلفته هتوصل لـ 7 مليار دولار ، بالإضافة إن الخط دا بيتم دراستة والكلام عليه من 2013 والى الآن مفيش اي حاجه فعلية إتنفذت ، اما لو الخط تم فعلًا فهو هينقل 2% بس من إحتياجات اوروبا من الغاز ، فبتالي مفيش اي تأثير على مصر ، لأن السوق الأوروبي سوق مفتوح زي ما ذكرنا في التقرير اللي فات .
#مصر النهارة أعلنت رسميًا عن مؤسسة إقليمية لغاز المتوسط مقرها في القاهرة بتضم كلًا من ( مصر وفلسطين والأردن وايطاليا وقبرص واليونان وإسرائيل ) والنهاردة أمريكا وفرنسا طلبوا الإنضمام لمنتدى غاز شرق المتوسط بصفتهم مراقبين دولييين .
#الحقيقة المطلقة في غاز شرق المتوسط هي ان مصر الدولة الأكثر إستفادة الى الآن ، بحيث إنها أصبحث مركز إقليمي لتداول الغاز من شرق المتوسط الى أوروبا عن طريق إستحواذ على نسب كبيرة من الغاز الإسرائيلي والقبرصي بالإضافة للغاز المصري وتصديرهم الى أوروبا بعد عملية التسييل
