كلامي / ياسر علي
-------
بسبب المغالاه في المهور
واشتراطهم الوظيفة
اللي بقت حلم كل شاب
حصل عزوف من الشباب عن الزواج
وبالتالي فساد الأخلاق واليأس ..!!
( مافيش مستقبل )
------------------------------
أنا سهل إني أتجوز .. جوازه ما بعدها جوازه
لكن مش حمل أي فراق .. وأنا لسه عريس طاظه
بتخطب ؟ تتسأل سؤالين ؟ ويتحدد طريقك فين ..
بتقبض كام وتملك إيه ؟ وإيه اللي إنت ناوي عليه ؟؟
وشاور تلقى ميت جاره !!
جوازه أصلها تجاره !
--------------------
أدي السمرا وأدي البيضه .. وأدي اللي تحب واللي تعيش
لو إنت في مره قلت ما فيش.. هتسمع أحلى تنهيده
وكلمة لأه جباره !
جوازة أصلها تجارة !
--------------------
ومين أولى ومين تختار .. أديك ليك 500 جاره
وشوف كام بنت في الحاره .. بتبعد عنك الأنظار
وساعة الجد تدّاره !
جوازة أصلها تجارة !
--------------------
أنا مش سهل قلبي يحب .. ياقلبي إيه بتزعل ليه
وتعشق ليه وتتعب ليه .. خلاص فارق زمان الحب
كأنه هبو في سيجاره
جوازة أصلها تجارة !
--------------------
يقولوا عليك وسيم وجميل .. لكن مش بره متغرب !
عشان للود تتقرب.. وإنت نضيف وأصل أصيل
وضاع الفكر يا خساره ..
جوازة أصلها تجارة !
--------------------
أنا عاوز لأبني أم.. منش عاوز ميمي ولولو
هسيب اللي يقولوا يقولوا.. عشان راجل وعندي دم
أكيد الدنيا دواره ..
جوازة أصلها تجارة !
--------------------