كتب/أيمن بحر
كنت فاكر اني لما احب حد لازم يحبني علي الاقل زي ما باحبه ..
كنت فاكر ان لما حد يبقي غالي عندي لازم ابقي غالي عنده ..
و كنت فاكر ان لما اهتم بحد و أسأل عليه بلهفة انه يرد علي اول ما اكلمه بنفس اللهفة و الشوق ..
و كنت برضه فاكر ان علاقتي بالناس بتكبر و تزيد كل ما الزمن يعدي .. و ان العلاقات مفيهاش مصالح حب صافي و عطاء مستمر ..
و كنت برضه فاكر ان لو حد زعل مني فيه سبب كبير قوي و أن ممكن لو اتعاتبنا نتصالح و نتصافي ..
و كبرت..
كبرت و عرفت ان اللي انا عايش فيه دي دنيا تانية دنيا من الخيال الجميل و المباديء الصافية اللي اتعلمتها..
و لما كبرت اتصدمت كتير لدرجة اني افتكرت اني اتربيت و اتعلمت غلط ..
بس برضه كبرت و لقيت نفسي مش عارف ابقي غير كده و لا ناوي اتغير ..
استغربت نفسي من غير حب و لهفة و تسامح و احسان للكل و ما عرفتش اكره و لا انتقم و لا حتي أغير قلبي ..
بالكتير بالملم جراحي و ابعد و اخد جنب و اقبل اني ابات مغلوب مش غالب و مظلوم مش ظالم ..
و كبرت و عرفت ان ربنا بس هو اللي بيعوضني عن دموعي المحبوسة و مشاعري المصدومة..
و يقول الناس اللي يقولوه و يعملوا اللي يعملوه بس ح ابقي زي ما انا راضي و متراضي و قابل اني احب و اكمل احب لكل شخص و لاي شخص ..
و مش مستني حاجة من الناس مستني بس الخير و التعويض من رب كل الناس ..